“Əmrah Həsənli: Dövlət olmaq var, dövlət kimi qalmaq var – Heydər Əliyev bunu bacardı”

Azərbaycan xalqının taleyində bəzi günlər var ki, onlar sıradan tarixi hadisə yox, milli mövcudluğumuzu qoruyan dönüş nöqtələri kimi yadda qalır. 15 İyun – Milli Qurtuluş Günü də məhz belə bir gündür. Bu tarix, Azərbaycanın sabitliyə, inkişaf yoluna çıxmasına imkan verən qətiyyətli və uzaqgörən bir liderin – Ulu Öndər Heydər Əliyevin Azərbaycan dövlətçiliyinə yenidən rəhbərlik etdiyi gün kimi yaddaşlara həkk olunub. Bu gün biz təkcə bir qayıdışı yox, bir qurtuluş fəlsəfəsini, milli ideyanı və güclü dövlətin təməlini xatırlayırıq.

Heydər Əliyev Azərbaycana rəhbərliyinin hər iki dövründə ölkəni sadəcə idarə etmədi – o, bu torpağa dövlətçilik mədəniyyəti gətirdi. Onun siyasi irsi xalqın güvəndiyi, etibar etdiyi və arxasında dayandığı bir dövlət modeli qurmaqla bağlı idi. Ulu Öndər üçün dövlət – yalnız inzibati aparat deyil, eyni zamanda xalqın dəyərlərini, tarixini, mədəniyyətini və gələcəyini qoruyan bir canlı orqanizm idi. O bilirdi ki, xalqın güvəni olmadan heç bir dövlət uzunömürlü ola bilməz. Məhz bu güvən əsasında o, parçalanmaqda olan bir dövləti bütövlüyə, xaos içində olan bir cəmiyyəti sabitliyə və ümidsizlik girdabına düşmüş bir xalqı inam və qürur yoluna çıxardı.

Heydər Əliyevin siyasətində dövlətçilik bir şüar deyil, sistemli düşüncə tərzi idi. O, xalqın gücünə inanırdı, amma bu gücü doğru yönləndirmək üçün lider məsuliyyətinin fərqində idi. Onun rəhbərliyi ilə ölkədə hüquqi bazalar quruldu, ordu formalaşdırıldı, dövlət institutları təşkil olundu. Amma bütün bunlardan önəmlisi – cəmiyyətdə “dövlətə inam” anlayışı bərpa edildi. Çünki Heydər Əliyev üçün ən böyük zəfər torpaq yox, insan qazanmaq idi. İnsan isə öz liderinə yalnız əminliklə inana bilərdi. Bu əminliyi o, addım-addım, sözdə yox, əməldə yaratdı.

Bu gün Azərbaycan güclü, müstəqil və qalib bir dövlətdirsə, bu, Heydər Əliyev dühasının yetirməsi olan Prezident İlham Əliyevin liderliyi ilə davam etdirilən ardıcıl və prinsipial siyasətin nəticəsidir. İlham Əliyev dövlət idarəçiliyində emosiyaya yox, dövlət maraqlarına əsaslanan düşüncə modelini qoruyur. Bu yanaşma nəticəsində Azərbaycan həm siyasi, həm iqtisadi, həm də hərbi müstəvidə regional gücə çevrilib. Xüsusilə Qarabağın azad edilməsi və postmüharibə dövründə aparılan bərpa-quruculuq işləri bir daha göstərir ki, bu ölkədə verilən söz yerinə yetirilir, bu ölkədə dövlət xalq üçün işləyir.

Bu gün biz dövlətimizə nə qədər güvəniriksə, bu güvənin arxasında bir siyasət məktəbi, bir lider fəlsəfəsi dayanır. Heydər Əliyev məktəbi təkcə siyasətçilər üçün deyil, biz təhsil işçiləri üçün də örnəkdir. O göstərdi ki, düşünən, idarə edən, yön verən, xalqını tanıyan lider təhsilə, gəncliyə, milli kimliyə sahib çıxmaqla ölkənin taleyini dəyişə bilər. Bu, bizə həm məsuliyyət, həm də ruh verir.

15 İyun təkcə bir tarixi xatırlatmaq deyil. Bu gün biz öz gücümüzün, liderə güvənin və milli birliyin nələrə qadir olduğunu anırıq. Bu, qürur günüdür. Bu, Azərbaycanın qurtuluşla başlayan yüksəliş tarixinin başlanğıcıdır. Və bu tarix davam edir.